Last updated on 2017-10-15T10:25:04+03:00 at 10:25 ص
قواعد الدايت الاربعين عشان تخس
١-الدايت مش حرمان
٢-اشرب مايه كتير
٣-كلو فاكهه وخضار كتير
٤-الموز مسموح بيه والبطيخ والمانجه والعنب وكل الفواكه متاحه بس فى حدود السعرات المطلوبه منك تاكلها فى اليوم
٥-اشربو مايه كتير
٦-الزبادى باللمون مالوش علاقه بالتخسيس
٧- القرفه بتزود الحرق بس لو مبطلتش اكل مش حتخس
٨-لو شربت من هنا للسنه الجايه شاى اخضر مش حتخس غير نص كيلو دهون فقط لاغير(دراسه)
٩-اشربو ٨ كوبايات مايه فى اليوم
١٠-الكولا الدايت حتخزن مايه فى جسمك غير انها مش صحية يعنى متنفعش مع الرجيم متضحكش على نفسك
١١-لما تطلب اكل من بره متسكتش ضميرك باوردر الكولا الدايت (ارجع للنقطه١٠)
١٢اشربو من ٢-٣لتر مايه يوميا
١٣-الجبنه القريش حلوه والله جرب بس تحبشها بشويه كمون او زعتر وطماطم وزيت زتون … هايله
١٤-الرقم اللى على الميزان مش ده الهدف بطل تقيس وزنك كل شويه ارمى الميزان احسن
١٥-ايوه وجبه الفطار مهمه جدا عشان الحرق فى جسمى يشتغل حتى ولو كوبايه لبن او تمره
١٦-اللى بياكل وجبه واحده فى اليوم بيتخن مش بيخس(الناس اللى بتقول انا مبكلش كتير)
١٧-اشربو مايه كتير
١٨-اهم حاجه الصبر وانت بتغير نظام حياتك للافضل ايوه التغيير بيحتاج وقت ده سر الناس اللى بتخس وبتوصل لنتيجه
١٩-البطيخ ممنوع فى الدايت ؟؟!!! مين اللى قال الكلام الجميل ده … لا طبعا كل حاجه متاحه حتى البطيخ ..راجع رقم ٤
٢٠-اسمها وجبه فرى مش يوم فرى ..اليوم الفرى انت كده بوظت مجهود اسبوع كامل
٢١- الوجبه الفرى تاكل اللى انت عايزه وبتحبه بس تحترم حجم المعده
٢٢-اشربو مايه كتير اوى
٢٣-الامساك بيقلل الحرق لازم تروح لطبيب ينظملك حركه جهازك الهضمى ويعالج الامساك
٢٤-الجوع بيقلل الحرق على فكره يعنى مش شطاره انك مجوع نفسك
٢٥-اشرب عصاير فريش كل العصاير المعلبه مليانه مواد حافظه حتحبس مايه فى جسمك وفيها سكر برضه حتى لو مكتوب خالى من السكر
٢٦-الاكل المتوازن اللى فيه كل العناصر الغذائيه هو ده اللى حيخسسك من غير ما صحتك العامه تتاثر.. اى اسم نظام غذائى تانى حيهدملك الكتله العضليه او حيتسسب فى نقص فيتامين
٢٧-متنسوش تشربو مايه كتير
٢٨-الرياضه حلوه
٢٩-مهما خسيتى على الميزان ووزنك نزل برضه بطنك حتفضل موجوده وطالعه عشان ممرنتيش عضلات البطن
٣٠-المشى سحر وبيزود الحرق وبيحرك عضلات الجسم وبيحافظ على كتله العضلات وبيحرق الدهون خصوصا دهون البطن
٣١-لازم تشوف مخزون الحديد فى جسمك اخباره ايه لان لو فى نقص فى الحديد مش حيكون عندك نفس تمشى خطوتين على بعض وكمان حيقلل الحرق
٣٢- مخزون الحديد فى الجسم مش الهيموجلوبين عشان ميحصلش لبس التحليل اسمه serum ferritin ولازم يكون اكتر من ١٥
٣٣-اشربو مايه كتير لحد ما تنزل من ودانكم :))
٣٤-تانى …كل الاكل اللى فى الدنيا متاح فى الدايت
٣٥-اتعلمو تحسبو السعرات اللى بتاكلوها على مدار اليوم فطار غدا عشا سناكس
٣٦-للسيدات الاكل ما يقلش عن ١٠٠٠ سعر والرجال ميقلش عن ١٤٠٠ سعر عشان العضلات متتهدمش ( من الاخر متجيش على نفسك وتقلل سعراتك مش شطاره لانك حتتهدم)
٣٧-ممكن تاكل وتنام عادى طالما انت ملتزم بكميه السعرات المسموحه (بس لاينصح للناس اللى عندها عسر هضم)
٣٨-لو مش بتحب اكله معينه ممكن تعملها بكزا طريقه مثلا الزبادى ممكن تعمله بالفواكه فى الخلاط او ايس كريم بالفواكه او سلطه بالخيار او حتى مع الجيلى
٣٩-لازم تغير من وعيك ونظرتك للاكل لان من هنا كل حاجه هتتغير ودى البدايه … وحط دافع قوى يفكرك دايما انك لازم تخس عشانه (مهم اوى)
٤٠-زى ما احنا بنتعلم طول الوقت نتكلم ازاى نلبس ازاى نتعامل ازاى بشياكه لازم نتعلم ازاى نبقى شيك حتى فى اكلنا
