الخبز الماليزي الذيذ 2014

Last updated on 2020-06-19T17:33:52+03:00 at 05:33 م

وأخيرا لقيت الوصفة وطبقتا ، وطلعت بتجنن وبتشهي ممممم
ولكل يللي ما بيعرفوا هاد الخبز ، هوي أكلة ماليزية المنشأ ، من حوالي السنتين دخلت البلاد العربية وانتشرت ، ومحبينا كتيير كتاااار ولتعرف طريقتا تابعنا ولا تحتاااار
أولا / مكونات العجينة : ٤ كوب طحين ، ٢ م ك حليب بودرة ، ٢ بيضة ، م ك خميرة ، م ص بيكنج باودر ، اصبع زبدة ٧٥ غرام لين بحرارة الغرفة ، ٤ م ك سكر ، كوب ماء فاتر للعجن ورشة ملح.
منخلط السكر والخميرة بكاسة الماء الفاتر وعجنب……منخلط الطحين والحليب والبيكنج باودر ورشة الملح ومنضيف فوقن البيض ومنخلط البيض مع الطحين لحتى يختفى ، وورا البيض منحط اصبع الزبدة والماء الفاتر ومنفرك ومنعجن لنحصل على عجينة متماسكة ، ثم منتركا ترتاح وتتخمر لمدة ساعة.

ثانيا / لتحضير زبدة القهوة البنية منحتاج :
ثلاث ارباع الكأس سكر بني ناعم ، ثلاث ارباع الكأس طحين ، ١٠٠ غرام زبدة لينة بحرارة الغرفة ، م ك نسكافية ، م ص قهوة سريعة الذوبان ، ٢ م ط ماء لإذابة القهوة والنسكافية ، نص م ص قرفة ، نص م ص فانيليا ، بيضة .
منخفق الزبدة مع السكر البني شوي ، ثم منضيف وراهن البيضة والفانيليا والقرفة والنسكافية والقهوة المذوبين بملعقتين ماء ، وليختلطو منحط الطحين على ثلاث دفعات ومنخفق ، ولحتى يخلص الطحين وتصير زبدة القهوة جاهزة منحطها بكيس لوقت الاستخدام .

ثالثاً للحشو نحتاج قالب زبدة ابو ال٢٠٠ غرام يقطع مكعبات صغيرة وتوضع في الثلاجة لوقت الإستخدام.

بعد ما تختمر العجينة منفرغ منها الهواء ومنقسمها ١١ أو ١٢ كرة ، ثم منفتح كل قطعة عشكل دائرة ومنحط بقلبا قطعة زبدة ( اللي حاطينن بالثلاجة لوقت الحشو ) ومنسكر القطعة منيح ومنصف القطع بالصينية المدهونة زبدة ومنتركن حوالي ال ٤٠ دقيقة يختمروا.
ولما يختمروا رح ينفشو وهون منجيب زبدة القهوة اللي حاطينا بكيس ومنبلش نوزًع من الزبدة على كل كرة ، ومنخبزا بفرن حامي منكون مشعلينو من تحت ويفضل وضعها بالرف العلوي بالفرن لمدة ربع او تلت ساعة.
ولما تستوى منطلعها ، وما تاكلو هم ازا زبدة القهوة نزلت عالصينية ، نحنا بدنا القطعة يصير لونها بني وتغطيها الزبدة تغطية شاملة وبسهولة منشيل هدول الأطراف اللي بينزلو .

وآخر شي فينا نعمل صوص وهية كتيير بتلبق مع هالأكلةً واسما تغميسة الكابتشينو.
ولنعملها بدنا :
علبة قشطة سائلة ، ظرف كابتشينو ، م ص نسكافية مفروك باليد ليسهل ذوبانو ، ٢ م ط زيت ، ٢ م ط حليب بودرة ،
ولتحلية الخلطة ، إما بالحليب المكثف والمحلى ؛ الكمية اللي بدك ياها حطي ، أو عن طريق السكر البودرة وكمان كميتو على ذوقكن.
وهذة الخلطة تعتمد في تحضيرها على التحريك السريع و الجيًد.
ونضع من تغميسة الكابتشينو على القطع للتزيين وللطعم

ويفضل أن يقدًم الخبز ساخن مع صلصة الهيرشي او التوفي او تغميسة الكابتشينو

الرابط المختصر : /?p=2675

تفاصيل المقالة